ଗାଇଗୋରୁଙ୍କୁ ନିଜ ହାତରେ ଖୁଆଉଛନ୍ତି ଅନନ୍ତ!
କେନ୍ଦ୍ରାପଡ଼ା, (ଆଇଏନ୍ଏସ୍): ଆମ ଦେଶକୁ କରୋନା ମହାମାରୀରୁ ରକ୍ଷା କରିବାକୁ ସମଗ୍ର ଦେଶ ଲକଡ଼ାଉନ୍ (ତାଲା ବନ୍ଦି) ଅବସ୍ଥାରେ ରହିଛି । ଚାରିଆଡ଼େ ଶୂନଶାନ୍ । ସବୁଠି ଲକଡ଼ାଉନ୍ ର କରୁଣ ଅବସ୍ଥା! ଅନେକ ଲୋକେ ବହୁ ଅସୁବିଧାରେ ଜୀବନ କାଟୁଛନ୍ତି । ଏହି ସମୟରେ ଦେଖାଯାଉଛି, ଚାରିଆଡ଼େ ଗୃହପାଳିତ ପଶୁଙ୍କ ସମେତ କୁକୁର, ବିରାଡ଼ି, ପକ୍ଷୀ ମାନେ ଖାଦ୍ୟ ବିକଳରେ ହନ୍ତସନ୍ତ ହେଉଛନ୍ତି । ଅହରହ ଚଳଚଂଚଳ ଥିବା କେନ୍ଦ୍ରାପଡ଼ା ସହର ମଧ୍ୟ କୋଳାହଳ ଠାରୁ ମୁକ୍ତି ପାଇଛି । ହେଲେ ଖାଦ୍ୟ ପାଇ ପାରୁନଥିବାରୁ ସହରର ଗାଈଗୋରୁ ଆଦି ଗୃହପାଳିତ ପଶୁମାନଙ୍କର ଶୋଚନୀୟ ଅବସ୍ଥା ଦେଖିବାକୁ ମିଳୁଛି । ଗାଈଗୋରୁ ମାନଙ୍କର ଏଭଳି ବିକଳ ଅବସ୍ଥା ଦେଖି କେତେକ ସ୍ୱେଚ୍ଛାସେବୀ ମଧ୍ୟ ସେମାନଙ୍କୁ ଖାଦ୍ୟ ଯୋଗାଇବାକୁ ନିଜର ହାତ ବଢେଇଛନ୍ତି । ସେହି ଯୁବକ ମାନଙ୍କ ମଧ୍ୟରେ ଅଛନ୍ତି କେନ୍ଦ୍ରାପଡ଼ା ସହରର ଜନୈକ ଯୁବକ ସ୍ୱେଚ୍ଛାସେବୀ ତଥା ସାମ୍ବାଦିକ ଅନନ୍ତ ଗୋପାଳ ସାହୁ । ନଖାଇ ନପିଇ ନିର୍ଜ୍ଜନ ସହର ଭିତରେ ବୁଲୁଥିବା କେତେକ ଗାଈଗୋରୁଙ୍କୁ ଅନନ୍ତ ନିଜ ହାତରେ ଖାଦ୍ୟ ଖୁଆଉଛନ୍ତି । ଆଉ ତାଙ୍କ ହାତରୁ ଖାଦ୍ୟ ଖାଇ ସେହି ଗାଈଗୋରୁ ମଧ୍ୟ ଯଥେଷ୍ଟ ସନ୍ତୁଷ୍ଟ ହେଉଥିବା ସେମାନଙ୍କ ମନର ଭାବରୁ ଷ୍ପଷ୍ଟ ହେଉଛି । ଏହା ଅନ୍ୟ ଏକ ମାନବିକତା ବୋଲି ସହରରେ ଚର୍ଚ୍ଚା ହେଉଛି ।