ପାରାଦୀପ: ବ୍ୟବସାୟୀ ହାଣିଲେ ବ୍ୟବସାୟୀଙ୍କୁ!
ପାରାଦୀପ, (ଆଇଏନ୍ଏସ୍): ସ୍ଥାନୀୟ ଜନୈକ ବ୍ୟବସାୟୀ ପାରାଦୀପ ବଜାର ଭିତରେ ଗୋଡ଼ାଇ ଗୋଡ଼ାଇ ଅନ୍ୟ ଜଣେ ବ୍ୟବସାୟୀଙ୍କୁ ଭୁଜାଲିରେ ହାଣିବା ଘଟଣା ବନ୍ଦର ସହରରେ ଚାଂଚଲ୍ୟ ସୃଷ୍ଟି କରିଛି । ଅଭିଯୋଗରୁ ଜଣାପଡ଼ିଛି ଯେ, ପାରାଦୀପ ବଜାରରେ ଲୁହାଲକତର ଦୋକାନ କରିଥିବା ବିଜେସ୍ ସିଂ ନାମକ ଜଣେ ବ୍ୟବସାୟୀଙ୍କୁ ତିନିଜଣ ଲୋକ ଠେଲି ଠେଲି ମାର୍କେଟ ଭିତରକୁ ଆଣି ଭୁଜାଲିରେ ହାଣିଥିଲେ । ପ୍ରାପ୍ତ ସୂଚନା ଅନୁଯାୟୀ ଅଭିଯୁକ୍ତ ମାନେ ମାର୍କେଟ ଭିତରର ବ୍ୟବସାୟୀ ବୋଲି ଜଣାପଡ଼ିଛି । ଆକ୍ରମଣର କାରଣ ଏହି ରିପୋର୍ଟ ଲୋଖା ହେବା ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଉକ୍ତ ବ୍ୟବସାୟୀଙ୍କୁ ଗୁରୁତର ଅବସ୍ଥାରେ ଅଠରବାଙ୍କୀ ବିଜୁ ମେମୋରିଆଲ୍ ହସ୍ପିଟାଲ୍ରେ ଭର୍ତି କରାଯାଇ ପ୍ରାଥମିକ ଚିକିତ୍ସା କରାଯାଇଥିବା ଜଣାପଡ଼ିଛି । ଘଟଣା ସ୍ଥଳରେ ପାରାଦୀପ ଆଦର୍ଶ ଥାନାର ଅଧିକାରୀ ରଜନୀକାନ୍ତ ସାମଲ ପହଂଚି ଅଭିଯୁକ୍ତ ମାନଙ୍କୁ ଥାନାକୁ ଆଣି ତଦନ୍ତ ଚଳାଇଛନ୍ତି ।