ବିଶୁଦ୍ଧ ଥଣ୍ଡାପାଣି କେନ୍ଦ୍ର ଉଦଘାଟିତ
ଭୁବନେଶ୍ୱର, (ଆଇଏନ୍ଏସ୍): ଭୁବନେଶ୍ୱର ଅଟୋ ମହାସଂଘ ଓ ସତ୍ୟସାଇ ସେବା ସଂଗଠନ ସହଭାଗିତାରେ ଆଜି ବାଣିବିହାର ଛକଠାରେ ବିଶୁଦ୍ଧ ଥଣ୍ଡାପାଣି କେନ୍ଦ୍ର ଉଦ୍ଘାଟିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବେ ଯୋଗଦେଇ ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଓ ସତ୍ୟାସାଇ ସେବା ସଂଗଠନର ରାଜ୍ୟ ସଭାପତି ନାରାୟଣ ପ୍ରସାଦ ସୁର ମିଳିତ ଭାବେ ଉଦ୍ଘାଟନ କରିଥିଲେ । ସତ୍ୟସାଇ ସେବା ସଂଗଠନ ପକ୍ଷରୁ ଭୁବନେଶ୍ୱରର ଆଚାର୍ଯ୍ୟ ବିହାର, ଜୟଦେବ ବିହାର ଭଳି ଜନବହୁଳ ସ୍ଥାନରେ ପୂର୍ବରୁ ଏଭଳି କେନ୍ଦ୍ର ଖୋଲାଯାଇ ଜଳସେବା ଯୋଗାଇ ଦିଆଯାଇଛି । ଏହା ବହୁ ଯାତ୍ରୀଙ୍କ ତୃଷ୍ଣା ମେଂଟାଇବାରେ ସହାୟକ ହୋଇଛି । ଆଗାମୀ ଦିନରେ ଆହୁରି ଅନେକ ସ୍ଥାନରେ ଏହିଭଳି କେନ୍ଦ୍ର ଖୋଲାଯିବ ବୋଲି ଭୁବନେଶ୍ୱର ଅଟୋ ମହାସଂଘର ସାଧାରଣ ସଂପାଦକ ପଦ୍ମନ କୁମାର ସାମଲ କହିଛନ୍ତି । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପ୍ରଶାନ୍ତ ରାଉତ, ଭୋଳାନାଥ ମହାରଣା, ଦେବରାଜ ପରିଡା, ବିଜୟ ପଟ୍ଟନାୟକ, କବିନ୍ଦ୍ର ପଶ୍ଚିମ ରାୟ, ରାଜା ନାୟକ, ବିଭୁତି କର ରମେଶ ମହାପାତ୍ର, ରାମଚନ୍ଦ୍ର ରାଉତ, ନାରାୟଣ ସ୍ୱାଇଁ ଓ ସେବାସଂଗଠନର ସି ଜଗଦିଶଙ୍କ ସହିତ ଅନ୍ୟାନ୍ୟ କର୍ମକର୍ତା ଉପସ୍ଥିତ ରହି ଜଳ ବଂଟନ କରିଥିଲେ ।