ନାଉଗାଁ ହାଟ ହାଇସ୍କୁଲ ପୁରାତନ ଛାତ୍ରଙ୍କ ବନ୍ଧୁମିଳନ

ନାଉଗାଁ, (ଆଇଏନ୍ଏସ୍):୧୯୮୫ ମସିହା ବ୍ୟାଚ୍ର ନାଉଗାଁ ହାଟ ହାଇସ୍କୁଲ ପୁରାତନ ଛାତ୍ରଛାତ୍ରୀଙ୍କ ବନ୍ଧୁମିଳନ ଉତ୍ସବ ସ୍ଥାନୀୟ ୟୁନିଟ ୧ ଆଖଣ୍ଡଳମଣି ମନ୍ଦିର ପ୍ରାଙ୍ଗଣରେ ଆଜି ଅଭୟ ପାଢୀ ଓ ପ୍ରସନ୍ନ ଦାସଙ୍କ ଆବାହକତ୍ୱରେ ଅନୁଷ୍ଠିତ ହୋଇଯାଇଛି । ପ୍ରଥମେ ମନ୍ଦିରରେ ଶ୍ରୀଜଗନ୍ନାଥ ମହାପ୍ରଭୁ, ଶ୍ରୀ ହନୁମାନଜୀ, ମହାଦେବଙ୍କ ନିକଟରେ ପୂଜାର୍ଚ୍ଚନା ଶେଷ ହେବା ପରେ ପୁରାତନ ଛାତ୍ରମାନଙ୍କର ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ ପୁରାତନ ଛାତ୍ର ତଥା ସନ୍ଥ ରାଧାବଲ୍ଲଭ ମଠର ମହନ୍ତ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ୩୫ ବର୍ଷ ବ୍ୟବଧାନରେ ସମସ୍ତ ପୁରାତନ ଛାତ୍ରଛାତ୍ରୀ ଏଠାରେ ଏକତ୍ରିତ ହୋଇ ମନ୍ଦିରରେ ପୂଜାର୍ଚ୍ଚନା କରି ସମସ୍ତଙ୍କର ଶୁଭକାମନା କରିଥିଲେ । ଏହି ଅବସରରେ ପୁରାତନ ଛାତ୍ର ସ୍ୱର୍ଗତ ଶତ୍ରୁଘନ ସାମଲ, ପ୍ରଶାନ୍ତ ଦାସ, ସ୍ୱାଧୀନ ଦାସ, ଅର୍ଜୁନ ନାୟକ ଓ ସଂଗ୍ରାମ ସିଂହଙ୍କ ସ୍ମୃତିଚାରଣ କରାଯିବା ସହ ଅମର ଆତ୍ମାର ସଦଗତି ନିମନ୍ତେ ଦୁଇ ମିନିଟ ନିରବ ପ୍ରାର୍ଥନା କରାଯାଇଥିଲା । ସର୍ବଶ୍ରୀ ସମୀର ମହାନ୍ତି, ଶିବ ପରିଜା, ଚୌଧୁରୀ ବିରଂଚି ନାରାୟଣ ଦାସ, ଇଂ ନକୁଳ ଗୋଚ୍ଛାୟତ, କୈଳାସ ସ୍ୱାଇଁ ଓ ପ୍ରୀତିରଂଜନ ଦାସ ପ୍ରମୁଖଙ୍କ ସମେତ ଶତାଧିକ ଛାତ୍ରଛାତ୍ରୀ ନିଜର ପରିବାର ସହ ଯୋଗଦେଇଥିଲେ । ଶେଷରେ ପୁରାତନ ଛାତ୍ରଛାତ୍ରୀଙ୍କର ଏକ କମିଟି ଗଠନ କରାଯାଇଥିଲା ।