ଉତର ଭୁବନେଶ୍ୱରରେ ଭଷାଣୀ ମହୋତ୍ସବ: ଭାଇଚାରାର ମନ୍ତ୍ରରେ ବିଦାୟ ନେଲେ“ମା”

ଭୁବନେଶ୍ୱର, (ଆଇଏନ୍ଏସ୍): ଓଡିଶାର ବଡପର୍ବ ଦଶହରା ଉତ୍ସାହର ସହ ଶେଷ ହୋଇଛି । ଓଡିଶାର କୋଣ ଅନୁକୋଣରେ ଥିବା ପୂଜା ମଣ୍ଡପରେ ଷଷ୍ଠୀ ଠାରୁ ବିଜୟା ଦଶମୀ ପର୍ଯ୍ୟନ୍ତ ପୂଜା ପାଉଥିବା ମହାମାୟା, ଦୁର୍ଗତିନାସିନୀ, ମହିସା ମର୍ଦ୍ଧିନୀ ମା’ଙ୍କ ମୃଣ୍ମୟ ପ୍ରତିମା ଭଷାଣୀରେ ପାରମ୍ପରିକ ବାଦ୍ୟ, ଘଂଟ, ହୁଳହୁଳି, ବିଭିନ୍ନ ନୃତ୍ୟ ଓ ଆଧୁନିକ ଡିଜେ ଧୁନ୍ ଏବଂ ଆତସବାଜିରେ ବିଦାୟ ନେଇଛନ୍ତି । ଅଶ୍ରୁପ୍ଳାବିତ ହୋଇ ଯାଇଛନ୍ତି ଅଗଣିତ ଭକ୍ତ । ରାଜଧାନୀରେ ଅନୁଷ୍ଠିତ ଭଷାଣୀ ଉତ୍ସବରେ ନୟାପଲ୍ଲୀରେ ୧୮ ମେଢ଼, ସହିଦ ନଗରରେ ୨୩ ମେଢ଼, ପୂରୁଣା ଭୁବନେଶ୍ୱରରେ ୨୨ ମେଢ଼ ଓ ଉତର ଭୁବନେଶ୍ୱରରେ ୨୦ ମେଢ଼ ଯୋଗ ଦେଇଛନ୍ତି ।
ଉତର ଭୁବନେଶ୍ୱର ଭଷାଣୀ କମିଟି ପକ୍ଷରୁ ଚନ୍ଦ୍ରଶେଖରପୁର ମେଳଣ ପଡିଆଠାରେ ଆୟୋଜିତ ଭଷାଣୀ ଉତ୍ସବରେ ୨୦ଟି ମେଢ଼ ଯୋଗ ଦେଇଥିଲେ । ଏଥି ମଧ୍ୟରେ ଡମଣା, ଶୈଳଶ୍ରୀ ବିହାର, ନିଳାଦ୍ରି ବିହାର, ଡିଷ୍ଟ୍ରିକ୍ଟ ସେଂଟର, ନନ୍ଦନ ବିହାର, ବିଡିଏ କଲୋନୀ, ଶିଖର ଚଣ୍ଡି, ଇଞ୍ଜଣା ଓ ଅନ୍ୟାନ୍ୟ ପୂଜା ମଣ୍ଡପରୁ ମେଢ଼ ଗୁଡିକ ବିଭିନ୍ନ ବାଦ୍ୟ, ଆତସବାଜି ପାରମ୍ପରିକ ନୃତ୍ୟ ଓ ଡିଜେଧୁନ୍ ନାଚରେ ପଡିଆ ଭିତରକୁ ପ୍ରବେଶ କରିଥିଲେ । ଭଷାଣୀ କମିଟି ସଭାପତି ମଧୁମାଧବ ଜେନାଙ୍କ ସଭାପତିତ୍ୱରେ ଅନୁଷ୍ଠିତ ସମ୍ବର୍ଦ୍ଧନା ସଭାରେ ମୁଖ୍ୟଅତିଥି ଭାବେ ସାଂସଦ ପ୍ରଶନ୍ନ ପାଟ୍ଟଶାଣୀ, ଉତର ବିଧାୟକ ପ୍ରିୟଦର୍ଶି ମିଶ୍ର, ମେୟର ଅନନ୍ତ ନାରାୟଣ ଜେନା ଓ ଉତରର ସମସ୍ତ କର୍ପୋରେଟର ପ୍ରମୁଖ ଯୋଗ ଦେଇଥିଲେ । ସଂଯୋଜକ ସମରେନ୍ଦ୍ର ସାହୁ ଓ ମିହିର ରାଉତଙ୍କ ସଂଯୋଜନାରେ ବିଭିନ୍ନ କ୍ଷେତ୍ରରେ ଅବଦାନପାଇଁ ବିଶିଷ୍ଟ ବ୍ୟକ୍ତି ବିଶେଷ ଓ ସାମ୍ବାଦିକ ମାନଙ୍କୁ ସମ୍ବର୍ଦ୍ଧନା ଦିଆ ଯାଇଥିଲା । ସମସ୍ତ ପୂଜା କମିଟିର ସଭାପତି ସଂପାଦକଙ୍କୁ ସମ୍ବର୍ଦ୍ଧିତ କରାଯାଇଥିଲା । ଅମୃତ ସହର ମୃତକଙ୍କ ପାଇଁ ନିରବ ପ୍ରାର୍ଥନା ସହ କ୍ୟାଣ୍ଡେଲ ଜାଳି ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା । ଏହି ଉତ୍ସବର ବିଶେଷ ଆକର୍ଷଣ ଥିଲା ଗାଡକଣ ପୂଜା କମିଟି ଦ୍ୱାରା ପ୍ରସ୍ତୁତ ୧ କ୍ୱିଂଟାଲ ୨୦ କେଜି ଲଡୁ । ଏହାକୁ ନିଲାମ ଡକାଯାଇ ୫ ହଜାରରୁ ୨୫ ହଜାରରେ ଦିଆଯାଇଥିଲା । କମିଟିର କର୍ମକର୍ତା ଭୁବନାନନ୍ଦ ଜେନା, ପ୍ରଦିପ ଜେନା, ସୁରେସ ରଥ ଓ ସନ୍ତୋଷ ମହାନ୍ତି ଉପସ୍ଥିତ ରହି ଉତ୍ସବକୁ ପରିଚାଳନା କରିଥିଲେ । ରାତ୍ରି ୮ ଘଟିକା ସମୟରେ ପଡିଆରୁ ମେଢ଼ ଗୁଡିକ ବାହାରି ବିଭିନ୍ନ ବାଦ୍ୟ ଓ ନାଚର ତାଳେ ତାଳେ କଳିଙ୍ଗ ହସ୍ପିଟାଲ୍ ଛକ, ସୈନିକ ସ୍କୁଲ ଛକଦେଇ କୁଆଖାଇ ଅଭିମୁଖେ ଯାତ୍ରା କରିଥିଲେ । ଏଥିମଧ୍ୟରେ ଡିଜେ ଧୁନ୍ ନାଚ, ଘୋଡା ନାଚ, ଘଂଟପାଟୁଆ, ମାର୍ଦଳ ବାଜା, ଢୋଲବାଜା, ବ୍ୟାଣ୍ଡ ପାର୍ଟି, ଦୁଲ୍ଦୁଲି ବାଜା, ଦକ୍ଷିଣୀ ନାଚ, ନିଆଁ ଖେଳ, ସହିତ ବିଭିନ୍ନ ଭଣ୍ଡ ବାବାଙ୍କ ବେଶଧାରି ବ୍ୟକ୍ତିମାନେ ଆତସ ବାଜି କରୁଥିଲେ । ପଡିଆଠାରୁ ରାସ୍ତା ସାରା ଲୋକମାନେ ଏକତ୍ରିତ ହୋଇ ଏହାର ମଜା ନେଉଥିଲେ । ଶେଷରେ କୁଆଖାଇ ଠାରେ ମା’ଙ୍କ ମୃଣ୍ମୟ ପ୍ରତିମାଙ୍କୁ ଅସ୍ଥାୟୀ ପୁଷ୍କରିଣୀରେ ବିଷର୍ଜନ କରାଯାଇଥିଲା ।