ପାରାଦ୍ୱୀପରେ କୋଭିଡ୍ କେଆର ସେଂଟର ପ୍ରତିଷ୍ଠାକୁ ନେଇ ଭ୍ରମାତ୍ମକ ବାତାବରଣ ସୃଷ୍ଟି ପାଇଁ ଉଦ୍ୟମ

ପାରାଦ୍ୱୀପ, (ଆଇଏନ୍ଏସ୍): ସାରା ରାଜ୍ୟରେ କୋରୋନା ମହାମାରୀ ସଂକ୍ରମଣକୁ ନିୟନ୍ତ୍ରଣ କରିବା ପାଇଁ ଓ ଚିକିତ୍ସା ନିମନ୍ତେ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପ୍ରତିଷେଧକ ମୂଳକ ବ୍ୟବସ୍ଥା ଗ୍ରହଣ କରାଯିବା ସହ ସହଜ ସ୍ୱାସ୍ଥ୍ୟ ସେବା ଉପଲବ୍ଧ ନିମନ୍ତେ ରାଜ୍ୟର ବିଭିନ୍ନ ସ୍ଥାନରେ କୋଭିଡ୍-୧୯ର ଚିକିତ୍ସାଳୟର ଯୁଦ୍ଧକାଳୀନ ଭିର୍ତିରେ ନିର୍ମାଣ ଚାଲିଛି । ସେହିପରି ଜଗତସିଂପୁର ଜିଲ୍ଲାର ବନ୍ଦର ଓ ଶିଳ୍ପ ସହର ପାରାଦ୍ୱୀପରେ ଏକ କୋଭିଡ୍-୧୯ ସ୍ୱାସ୍ଥ୍ୟ କ୍ଷେତ୍ରକେନ୍ଦ୍ର ଥିବା ବେଳେ ଆବଶ୍ୟକତା ଦୃଷ୍ଟିରୁ ରାଜ୍ୟ ସରକାରଙ୍କ ନିଷ୍ପତି ଅନୁସାରେ ପାରାଦ୍ୱୀପ ବନ୍ଦର ପକ୍ଷରୁ ପୋର୍ଟ କ୍ଳବରେ କୋଭିଡ କେଆର ସେଂଟର କରାଯିବାକୁ ନେଇ ୧୬ନଂ ୱାର୍ଡର କିଛି ନ୍ୟସ୍ତ ସ୍ୱାର୍ଥ ବ୍ୟକ୍ତି ବିଶେଷ ଯେପରି ବିଭ୍ରାନ୍ତିକର, ଭ୍ରମାତ୍ମକ ବାତାବରଣ ସୃଷ୍ଟି କରୁଛନ୍ତି, ତାହା ଅତ୍ୟନ୍ତ ଦୁର୍ଭାଗ୍ୟର ବିଷୟ ବୋଲି କୁହାଯାଉଛି । କରୋନା ଭୂତାଣୁ ଆକ୍ରାନ୍ତଙ୍କ ଛିଙ୍କ ବା କାଶରେ ସଂକ୍ରମଣ୬ ଫୁଟ ଦୂରତା ଯାଏଁ ବ୍ୟାପିବାର ବୈଜ୍ଞାନିକ ପ୍ରମାଣ ରହିଛି । ତେଣୁ ସଂକ୍ରମଣରୁ ରକ୍ଷା ପାଇଁ ଦୁଇ ଲୋକ ବା ଶଯ୍ୟା ମଧ୍ୟରେ ଅନୁ୍ୟନ ୬ଫୁଟ ଦୂରତା ଅବଲମ୍ବନ କରାଯିବ ଆବଶ୍ୟକ । ସେଠାରେ ରହିବାକୁ ଥିବା ସନ୍ଦିଗ୍ଧଙ୍କୁ ଫେସ୍ ମାସ୍କ ଯୋଗାଇ ଦିଆଯିବ ଯାହା କି ଉଭୟ ନାକ ଆଉ ମୁହଁକୁ ଆଚ୍ଛାଦିତ କରି ରଖିବ । ସରକାର, ସାମାନ୍ୟ ବା ବାହାରକୁ ଜଣା ପଡିନଥିବା ଲକ୍ଷଣ ଯୁକ୍ତ ବ୍ୟକ୍ତିଙ୍କୁ ହୋମ ଆଇସୋଲେସନର ଅନୁମତି ଦେଉଛନ୍ତି, ଯଦି ସେମାନଙ୍କ ଘରେ ପାଇଖାନା ଥା ସ୍ୱତନ୍ତ୍ର କୋଠରୀ ରହିଛି । ଏପରି ବ୍ୟକ୍ତି ପୋର୍ଟ ଟାଉନସିପରେ ରହିଲେ, ବିଲ୍ଡିଂରେ ଅନ୍ୟ ପରିବାର ବର୍ଗ ନିଜକୁ ସୁରକ୍ଷତି ମନେ ନ କରି ପ୍ରବଳ ମନସ୍ତାପ ମଧ୍ୟରେ ଗତି କରିବାର ଆଶଂକା ରହିଛି । ଏହାଛଡା ହୋମ ଆଇସୋଲେସନ ସୁବିଧା ସମସ୍ତଙ୍କ ଘରେ ନାହିଁ ଏବଂ ବନ୍ଦର ନଗରୀରେ ଗୋଟିଏ ବିଲ୍ଡିଂରେ ୪ ରୁ୬ଟି ଘର ରହିଛି । ଏପରି ସ୍ଥଳେ ସରକାରୀ ନିୟମାନୁସାରେ କିଛି ଲକ୍ଷଣ ନଥିବା କିମ୍ବା ସାମାନ୍ୟ ଲକ୍ଷଣ ଯୁକ୍ତ ରୋଗୀ ଏକ କେଆର ସେଂଟରରେ ଉପଯୁକ୍ତ ସୁବିଧା ସହ ରହିବା ଉଚିତ୍ । ତେଣୁ ସେମାନେ ସ୍ୱତନ୍ତ୍ର ଆଇସୋଲେସନରେ ରହିଲେ ଏ ସମସ୍ୟା ରହିବ ନାହିଁ । ପ୍ରସ୍ତାବିତ କେଆର୍ ସେଂଟର ଶର୍ଯ୍ୟା ଠାରୁ ପାଶ୍ୱବର୍ତି ରାସ୍ତାର ଦୂରତା ୧୦ ଫୁଟରୁ ବି ଅଧିକ । କୋଭିଡ କେଆର ସେଂଟରରେ ଶୀତ ତାପ ନିୟନ୍ତ୍ରିତ ବ୍ୟବସ୍ଥା ଥିବାରୁ ସେଠାରେ ଝରକା କବାଟ ସର୍ବଦା ବନ୍ଦ ରହିବ ଏବଂ ବାହାର ପଟ ଝରକା ରେ ମଶାରୀ ଲଗା ଯିବ । ପୋର୍ଟ କ୍ଳବ ରୁ ନିକଟସ୍ଥ କଲୋନୀ ଦୂରତା ପ୍ରାୟ ଶହେ ମିଟର ତଥା ପୋର୍ଟ କ୍ଳବ୍ ଚାରିପଟେ ଏକ ସୁରକ୍ଷିତ ପାଚେରୀ ରହିଛି । ରାଜ୍ୟ ପ୍ରଶାସନର ନିୟମାନୁସାରେ ବାହାରୁ ଯାଉଥିବା ପ୍ରତ୍ୟେକ ଲୋକ ମାସ୍କ ପିନ୍ଧିବା ଜରୁରୀ । କୋଭିଡ କେଆର ସେଂଟର ର ବର୍ଯ୍ୟ ବସ୍ତୁ କୁ ବାୟୋମାସ ଆବର୍ଜର୍ନା ପରିଚାଳିତ ନୀତି ଅନୁସାରେ ନଷ୍ଟ କରାଯିବ । ବର୍ତମାନ ଯାଏଁ ମିଳିଥିବା ବୈଜ୍ଞାନିକ ସିନ୍ଧାନ୍ତ ଅନୁସାରେ ଆଇସୋଲେସନ କେନ୍ଦ୍ର ନିକଟରେ ଚଳପ୍ରଚଳ କରୁଥିବା କୌଣସି ଯାତ୍ରୀ କରୋନା ଆକ୍ରାନ୍ତ ହେବାର ପ୍ରମାଣ ନାହିଁ । ପାଖ କ୍ୱାର୍ଟର ବା ଷ୍ଟାଡିୟମକୁ ଯିବାକୁ ଛଚ୍ଛୁକ ବ୍ୟକ୍ତି ଅନ୍ୟ ପାଶ୍ୱର୍ବର୍ତୀ ବିକଳ୍ପ ମାର୍ଗରେ ଯାଇପାରିବେ । ତେଣୁ ମୁଷ୍ଟିମେୟ ବ୍ୟକ୍ତିବିଶେଷ ବନ୍ଦର କର୍ତୃପକ୍ଷଙ୍କ ଜନସେବା ମୂଳକ କାର୍ଯ୍ୟକୁ ବିରୋଧ କରି ବାଃ ବାଃ ନେବାରୁ କ୍ଷାନ୍ତ ହୁଅନ୍ତୁ ବୋଲି ସ୍ଥାନୀୟ ବୁଦ୍ଧିଜୀବୀ ମହଲରେ ମତ ପ୍ରକାଶ ପାଉଛି ।