ହୋଲି ପୂର୍ବରୁ ଭାଇ ରକ୍ତରେ ଭାଇ ଖେଳିଲା ହୋଲି!
ପାରାଦୀପ, (ଓଏନ୍ଏସ୍): ଆଜି ପାରାଦୀପ ନୂଆବଜାର ବସ୍ତିରେ ଏକ ଅଭାବନୀୟ ଘଟଣା ଘଟିଛି । ସମସ୍ତେ ଦୋଳ ପୂର୍ଣ୍ଣିମାର ହୋଲି ପର୍ବରେ ମସଗୁଲ୍ ଥିବା ବେଳେ ବଡ ଭାଇର ମାରଣାସ୍ତ୍ର ଚୋଟରେ ସାନ ଭାଇର ଜୀବନ ଯାଇଛି । ପାରାଦୀପ ଆଦର୍ଶ ଥାନା ଅନ୍ତର୍ଗତ ନୂଆ ବଜାର ଅଂଚଳରେ ରୁହନ୍ତି ଟ୍ରାଫିକ୍ ବିଭାଗରେ କାର୍ଯ୍ୟରତ ଗୌରାଙ୍ଗ ସ୍ୱାଇଁ । ସ୍ତ୍ରୀ, ଦୁଇ ପୁଅ, ବୋହୂ ମାନଙ୍କ ସହ ଦୀର୍ଘ ଦିନ ହେବ ନୂଆ ବଜାର ସ୍ଥିତ ଏନ୍.ବି.୨୫ ରେ ରୁହନ୍ତି । ବଡ ପୁଅ ମାନସିକ ବିକାରଗ୍ରସ୍ତ ଥିବା କୁହା ଯାଉଥିବା ବେଳେ ସାମାନ୍ୟ ଘଟଣାକୁ ନେଇ ଏ ଭଳି କାଣ୍ଡ ଘଟିଥିବା ଅନୁମାନ କରାଯାଉଛି । ବଡ ପୁଅ ପ୍ରଦିପ୍ତ ସ୍ୱାଇଁ ମାନସିକ ଭାରସ୍ୟାମ ହରାଇ ମଝିରେ ମଝିରେ ଘରେ ଗଣ୍ଡଗୋଳ କରୁଥିବା କହିଛନ୍ତି ଗୌରାଙ୍ଗ । କିନ୍ତୁ ଆଜି ଏକ ଛୋଟିଆ ଘଟଣାକୁ ନେଇ ବଡ ପୁଅ ଉତକ୍ଷିପ୍ତ ହୋଇ ଏଭଳି କାଣ୍ଡ ଘଟାଇଥିବା ଜାଣିବାକୁ ମିଳିଛି । ପ୍ରଦିପ୍ତଙ୍କ ଛୋଟ ପୁଅକୁ ସାନ ଭାଇ ସୁଦିପ୍ତ ଧରି ଗେହ୍ଲା କରୁଥିଲେ । ହଠାତ୍ ପ୍ରଦିପ୍ତ ଉତକ୍ଷିପ୍ତ ହୋଇ ସାନ ଭାଇ ସହ ଝଗଡା ଆରମ୍ଭ କରିଥିଲା । ଏହାକୁ ନେଇ ଦୁଇ ଭାଇଙ୍କ ମଧ୍ୟରେ ବଚସା ହୋଇଥିଲା । ଏହି ଛୋଟ ଘଟଣାକୁ ନେଇ ବଡଭାଇ ମାରଣାସ୍ତ୍ରରେ ସାନ ଭାଇକୁ ଆକ୍ରମଣ କରିଥିଲା । ଗୁରୁତର ଭାବେ ଆହତ ସୁଦିପ୍ତ ଙ୍କୁ ବନ୍ଦର ଚିକିତ୍ସାଳୟକୁ ନିଆ ଯାଇଥିବା ବେଳେ ଡାକ୍ତର ମୃତୁ୍ୟ ଘୋଷଣା କରିଥିଲେ । ବଡ ଭାଇର ଏଭଳି କଦର୍ଯ୍ୟ ଘଟଣାରେ ଗୋଟିଏ ନିରିହ ଜୀବନ ଚାଲି ଯାଇଥିବା ବେଳେ ଏହି ଘଟଣା ପାରାଦୀପ ଅଂଚଳରେ ଦୁଃଖର ଛାୟା ଖେଳାଇ ଦେଇଛି । ଗୋଟିଏ ଛାତ ତଳେ ଦୁଇ ଭାଇ ଖୁସିରେ ରହୁଥିବା ବେଳେ ବଡ ଭାଇର ଏଭଳି ଛୋଟିଆ ଭୂଲ ପାଇଁ ନିଜ ସାନ ଭାଇକୁ ହରେଇ ବସିଲା । ପରିବାର ପାଇଁ ବିରାଟ ଦୁଃଖ ଗ୍ରାସ କରିଛି । ବାପା ମା’ ସାନ ପୁଅକୁ ହରେଇଲେ । ଏଥିସହ ବଡ ପୁଅକୁ ଏହି ଘଟଣାରେ ଜେଲ ଭୋଗିବାକୁ ପଡିବ । ତେବେ ଏହି ଘଟଣା ପରେ ପାରାଦୀପ ଆଦର୍ଶ ଥାନାରେ ବଡ ଭାଇକୁ ଅଟକ ରଖି ପଚରା ଉଚରା ଜାରି ରହଛି ।